Navenda Nûçeyan- Walîtîya Mêrdînê ragihand, Hevseroka Şaredarîya Qoserê ya ser bi parêzgeha Mêrdînê ya Bakurê Kurdistanê ve Nîlûfer Elîk Yilmaz ji kar hat dûrxistin û li şûna wê Qeymeqamê Qoserê Huseyîn Çam wek qeyûm hat danîn.
Li gorî daxuyanîya Walîtîya Mêrdînê, derbarê Hevseroka Şaredarîya Qoserê Nîlûfer Elîk Yilmaz de bi tohmeta “endambûna rêxistina çekdar a terorê” li 2emîn Dadgeha Cezayên Giran a Mêrdînê dosya heye û ji ber vê yekê ji kar hatîye dûrxistin.
Nîlûfer Elîk Yilmaz vê sibê dema xwest biçe avahîya şaredarîyê polîsan rê nedane wê.
Şaredarîya Qoserê jî li ser hesabê xwe yê twîtterê nivîsîye: “Qeyûm bo şaredarîya me hatîye danîn û teblîxata fermî nadin Seroka Şaredarîya me."
Heta niha ji alîyê hikûmeta Tirkîyê ve li ser 14 şaredarîyên Bakurê Kurdistanê yên di destê HDPê de qeyûm hatine danîn û hevserokên şaredarîyan an hatine dûrxistin an jî hatine girtin û lêpirsîn derbarê wan de hatine vekirin.
Di hilbijartina roja 31ê Adara 2019an de HDPê 69 şaredarî bidest xistin. Her ji destpêkê ve şeş şaredarî ji ber biryarên rewşa awarte nikarîn mohleta destbikarbûnê werbigirin û şaredarî gehiştin berbijêrên AKPê.
Piştre qeyûm bo ser 14 şaredarîyan hatin danîn ku 3 ji wan şaredarîyên mezin in. Bi vê yekê ji 69 şaredarîyan tenê 49 şaredarî di destê HDPê de mane.