Navenda Nûçeyan- Li nav bajarê Efrînê yê Rojavayê Kurdistanê teqînek çê bû û li gor zanyarîyên destpêkê, di encama teqînê de kuştî û birîndar hene.
Çavkanîyekî taybet ji nav Efrînê ji Rûdawê re ragihand, ku teqîn îro sere sibê bi rêya otomobîleke bombekirî û li Qada Kawayê Hesinkar a bajarê Efrînê çê bûye.
Bi gotina heman çavkanîyê ku ji ber sedemên ewlehîyê û parastina canê wî, Rûdaw navê wî aşkere nake, teqînê baregeheke emnî ya Cebheya el Şamî ku grûpeke çekdar a opozisyona Sûrîyê û ser bi Tirkîyê ve ye, kirîye armanc.
Li gor zanyarîyên destpêkê, di encama teqînê de 7 çekdarên wê koma çekdar hatine kuştin û 5 çekdar û sivîlek jî birîndar bûne.
Ji ber teqînê zirareke mezin gihîştîye cihên derdorê û agireke mezin li cihê teqînê çê bûye.