Derbarê êrîşa Tirkîyê û grupên çekdar ên Surî yên girêdayî wê bo ser Rojavayê Kurdistanê û herwiha planên wan ên guhertina demografîya heremê de, 31 partî û hêzên sîyasî yên Rojavayê Kurdistanê û bakurê rojhilatê Sûrîyê nameyek ji Sekreterê Giştî yê Neteweyên Yekgirtî Antonio Guterres re şandin û daxwaz jê kirin, piştgirîyê nedin kiryarên ku artêşa Tirkîyê û grûpên çekdar li Rojavayê Kurdistanê û bakurê rojhilatê Sûrîyê ji bo guhertina demografîya herêmê pêk tînin.
Di nameya 31 partî û hêzên sîyasî de ku ji Sekreterê Giştî yê Neteweyên Yekgirtî Antonio Guterres re şandine, tê gotin; "Artêşa Tirkîyê bi êrîşa xwe ya di 9ê Cotmeha 2019an de bo ser Rojavayê Kurdistanê û bakurê rojhilatê Sûrîyê yasayên navnetewî binpê kirine û tawanên şer li dijî akincîyên heremê yên Kurd, Ereb, Suryanî, Asûrî, Misilman, Kirîstiyan û Êzidîyan kirine."
Partîyên ku ew name amade kirine, herwiha tekez kirine, ku armanca artêşa Tirkîyê ji êrîşê ew e ku heremê dagîr bike, xelkê heremê koçber bike û demografîya heremê biguhere.
Herwiha ew partîyên sîyasî di nameya xwe de dibêjin, "armanca rasteqîn a desthilata Tirkîyê ji navçeya aram ew e, ku navçeyeke aram bo grupên çekdar ava bike ku terorê zindî dikin."
Partî û hêzên sîyasî bang li Sekreterê Giştî yê Neteweyên Yekgirtî Antonio Guterres dikin ku li beramber êrîşên artêşa Tirkîyê û grûpên çekdar ên girêdayî wê rawestin û piştgirîyê nedin hewldanên Tirkîyê yên guhertina demografîya heremê.